Silmugi

Fiction by Kenneth Michael Baba |

SA unahang bahin sa balay-lungsod sa Borbon, ubos sa taytayan, sa dili pa katungtong sa yuta sa Brgy. Cadaruhan, nahimutang ang halapad nga suba nga maoy silbing dangpanan sa mga nahisalaag nga tubig-tubod sa bungtod nga maamumahong dawaton sa dagat sa ubos, ang Silmugi. Bantogan kining subaa dili lamang tungod sa iyang kalapad ug dili sama sa uban, agianan kuno kini kaniadto sa usa ka bulawanong barko maong pasidunggan kini matag tuig diin saulogon sa mga taga Borbon ang Silmugi Festival. Uban sa selebrasyon mao ang tinuig nga paghandom sa mga hugunhugon mahitungod sa mitolohiya nga kauban sa mga lumot nga nagpailawom niining subaa.

I

“Pa, nangita si Lola Lagring nimo. Morag importante kaayo ang tuyo, Pa,” pamukaw ni Kikoy sa iyang amahan nga bag-ohay lang nakalingkawas sa gapos sa alimungaw.

“Pasudla usa unya pahuwata lang kadiyot, Dong… padulong na ko,” ni Isyot samtang nangapkap sa iyang antepara nga, gawas sa iyang asawa, maoy sagad niyang ikadulog sa matag gabiing panghimudlay.

Migawas si Kikoy ug gidawat ang tiguwang nga mananabtan unya gipalingkod sa lantay taliwa sa ilang nataran. Masulub-on ang tiguwang ug nanghubag ang iyang tabuntabon nga daw di na motumaw ang iyang kalimutaw.

“Maayong buntag, Nang Agi! Naduaw man lagi ka. Unsay ato?” pasiuna ni Isyot nga inubanan sa maabiabihong pahiyom ug hapuhap sa iyang nagbusyad nga tiyan.

“Nia lagi ko, Kap, kay mangayo unta kog hinabang. Mipanaw na intawon si Noy Selmo nimo, unya wa man intawon miy ikapalit og lungon, Kap, uy. Bag-ohay pa baya intawon tong milarga sa Manila si Marivic.” Wala nay gisumpay ang tiguwang, daw panapos-pulong na niya kini ug gipadayag ang kinatibuk-an sa iyang mensahe pinaagi sa iyang danguyngoy.

“Ayaw lang kabalaka, Nang, kay mao man gayod tang tawo. Wala bayay mogamot dinhis kalibotan. Sagdi lang, naa may libre nga lungon ang atong munisipyo, modangop lang ko didto unya ipahatod nako sa inyo. Imoha na sad ning gamay nga hinabang, Nang, o, hinaot imong magamit,” tubag sa kapitan samtang gidunol ang gilukot niyang kinyentos pesos nga itagana unta para sa lawog sa iyang mga manok.

Migawas si Nang Agi nga may ginagmay nga pahiyom nga daklit nahimong takuban sa magul-anong panagway apan tataw gihapon sa iyang mga mata ang kahingawa sa pagpanaw sa iyang katambayayong sa kinabuhi sulod sa singkuwenta ka tuig.

 

II

WALA madugay, miabot si Tiyago nga kimpang, ilang silingan nga aser og swertres, nagdala og kinumot nga resita, subo kaayo ang panagway.

“Kap, maayong buntag. Si Marites napaakan og iro, gidala namo sa tambalanan sa Damolog apan wa man silay tambal. Kap, puyde ba kong kahuwam nimo bisan dos sentos lang? Ilisan lang nya nako inigdawat nakos Pantawid,” pakiluoy sa kimpang nga nahadlok intawon nga mahisama kang Nang Agring nga gibiyaan sa kapikas.

“Mao ba, Ago? O, diay tres sentos diri, oh, ipadali na ninyo, samtang sayo pa. Ipalit sa na sa pirmerong resita unya huwata na lang to ang libreng tambal sa Damolog. Maayo nang madapatan daan sa di pa mokatap ang rabis sa iro,” segun sa Kapitan.

“Daghang salamat, Kap, ilisan ko lang nya ni,” tubag ni Tiyago ug dali-daling miaginod pahilayo.

Sa pagbiya sa iyang mga katagibaryo, nanghupaw og lawom si Isyot ug gisundan dayon kini sa usa ka taghoy nga sama katagming sa tingog sa siloy.

“Pa, nganong anhi man na sila nimo mangayo og tabang? Di ka mahutdan og kuwarta?” sukit sa siyete anyos.

“Mao na man gayod ni akong gisudlan, Dong, sa wa pa matawo silas Kuya Rodney ug Ate Michelle nimo. Nia na ko ining natad sa politika. Bisan diyotay ra ning onoraryum, Dong, igoon lang god aron makatabang pod ta sa nanginahanglan. Matod pa bitaw ni Lolo nimo, mabahin man gani ang liso sa talisay sa pito ka managsoon, way rason nga ang ubang butang dili. Human namatay si Lolo Isko nimo, nangita man ang katawhan og ipuli isip kapitan. Wala tingali silay laing nakit-an, ako maoy gituboy. Bag-o pa ming minyo ni Mama nimo kaniadto,” tubag sa amahan.

“Pa, tinuod nga kanang Silmugi diha luyo sa atong balay managit og bata?”

“Ha-ha! Diin man sad ka kabati ana, Dong?” ni Isyot samtang gihapuhap ang alimpulo sa iyang anak.

“Na, silas Tiya Edna, Pa, ay. Ang dili kuno matu’g matag udto dagiton kuno anang subaa.”

“Sa tinuod lang, Dong, daghan nang estorya nga nagpaluyo anang subaa. Segun pa sa mga sugilanon, aduna kunoy bulawanong barko nga moagi diha, unya ang katiguwangan, anha dangop kon buot manghuwam og mga plato, kutsara, tenedor ug bisan unsa na lang. Labi na gyod kon dunay okasyon,” tubag sa amahan aron matagbaw ang kamapakisayron sa iyang anak.

Daklit naputol ang tubag-tubag sa dihang miagi si Moises nga mananggite nga nagdala og usa ka bulig nga saging kardaba ug usa ka galon nga tuba.

“Kap, maayong buntag. Kaseryoso bas inyong panagtabi diha,” ni Moises nga mipahuway sa iyang bug-at nga bitbit.

“Sus, Noy, kuryoso kaayo ning imong pag-umangkon, ay. Nangutana kon unsa kunoy estorya anang Silmugi sa luyo,” tubag sa kapitan.

“Ayda, Kikoy, kanang barko nga moagi dinha, magdala na og kardaba, tundan, ginamos pakapin una. Ha-ha! Mao nang Silmugi kay gikuha nas ngalan sa magtiayong Selmo ug Agi. Kanang estoryaha, Dong, nangamatay na lang ang nagmugna, nabulhog na lang ni akong pikas mata, wa gyod ko kakitag barko nga milabay diha. O, Kap, diay akong abot, oh, imo na ning duha ka sipi.” Dungan sa iyang bahakhak, gitunol ang saging sa kapitan. “Ari sa ko, Kap. Dong Kikoy, una lang ko.”

“Salamat kaayo ani, Noy. Naa gyod koy komisyon anang kada bulig nimo, da,” sa kapitan samtang naghinol sa iyang paboritong prutas nga ang kahinggon tataw kaayo nga wa moagi og kalboro.

“Pa… sige na, Pa, padayona ba,” pamugos sa bata nga nagsige og bitad sa gisul-ob nga kamisin sa amahan.

“Naa kuno nay sulod nga tulo ka di ingon nato ang barko, Dong— magtiayon ug usa ka anak. Sila ang mopahuwam sa mga kubyertos. Nag-abusar lang ang katawhan, wala na ipang-uli. Sukad adto, di na magpahuwam ang barko ug wala na poy nakasaksi nga moagi na diha. Nahanaw lang tog kalit, Dong, apan ang mga tsismis nagpabilin.”

“Unya, Pa, nakakita na ka ana nga miagi?” panukit-sukit ni Kikoy

“Sus, Dong, sukad sa akong pagkatawo, nakahuman na lang kog unom ka termino isip kapitan, wa gyoy barko nga miagi bisan iwag sa primus na lang,” tubag sa iyang amahan.

Nahilom si Kikoy sa iyang mga pangutana. Misulod si Kapitan Dionesio sa iyang panimalay aron lanayon ang tigson nga pandesal sa tinemplang kape sa iyang kapikas nga si Nang Nimfa. Wala na niya panumbalinga og hain paingon si Kikoy kay kinaiya man gayod sa usa ka bata ang pagka latagaw.

 

III

PADAYON nga nagtuyok ang kalibotan ug wa gihapon hidakpi sa Adlaw ang Buwan. Siyam ka buwan na lang, moabot na ang eleksiyon. Tawhay ra gihapong nanginabuhi ang pamilya kilid sa suba. Padayon gihapong manglaba si Nang Nimfa sa sapa matag Sabado ug kanunay gihapong manigbakay matag Domingo si Kapitan Isyot. Walay mauli nga bihag kay sa buwangan pa lang daan, mahurot nag panghatag. Sa laing bahin, si Kikoy, miundang nag pakisusi mahitungod sa Silmugi, padayon na lang kining nagpalupad sa iyang tabanog, mosakay sa takong dayon pasigirit sa may bakilid uban sa iyang mga ig-agaw. Sama sa naandan, di gihapon kini matulog matag udto. Makonsumisyon si Nang Nimfa og gukod kay hastang kulisawa na man lang gayod bataa.

 

IV

USA ka buntag, naghangos nga nagdagan si Kikoy paingon sa iyang nahinanok nga amahan. “Pa, mata pa, naay tambok nga bungoton nangita nimo nagdala og daghang tawo,” pamukaw sa bata nga daw may kahadlok basin dakpon ang iyang amahan.

“Sige, Ting, pasudla unya apasa si Mama nimo, basin tua pa to sa sapa.”

Gipasulod sa bata ang mayor nga daw siyam ka buwan nga nagsabak ug ang buhok nagkalkag sama sa usa ka ermitanyo. Dako kaayog ngisi ang mayor sa dihang gidawat sa iyang kaalyadong kapitan. “Maayong buntag, Pre Isyot, komosta na man ning hawak sa Poblacion, uy,” pasiunang pagtahod ni Mayor Lando Arisgado.

“Maayong buntag pod, M’yor. Nag-antos gihapon kos tumang kakabos. Pasensiya kaayo kay wa man ko kapangandam, kalit ka man lang mibutho. Dayon usa diri sa akong balay. Daghana pod nimog dalang higala, uy; unsa man tay atoa, M’yor?” sa kapitan.

Mitikang ang mayor paingon sa lantay ug didto gipasagdan ang iyang dakong tiyan, paa ug bitiis nga mopauraray sama sa iyang naandang buhaton sa iyang hacienda sa Lugo samtang magtan-aw sa iyang mga saop nga managbas og tubo.

“Bantogan man god kas kamanggihatagon, Pre… mangayo unta kog palit bugas! Ha-ha! Bitaw, daghang nagtaho nako nga basin motabok kuno kas pikas koral. Basig mapahak akong boto ining umaabot eleksiyon mao nang gianhi gayod tikag seguro kay kompare baya ta,” segun sa mayor dayong tungab sa iyang dala nga botelya sa pilsen.

“Nasayod gayod ka, M’yor, sugod pa lang sa akong pirmerong termino isip kapitan, diha na ni akong suporta nimo. Di lang tungod sa akong pagtahod sa imong pamilya apan tungod sa gidugayon sa atong panaghigala,” depensa ni Isyot.

“Kana maoy tubag nga akong gustong madungog. Buyno, karong eleksiyona makahatag ba gihapon ka nakog landslide nga botos dinhi sa Poblacion?”

“Kanus-a ba god tika gipakyas, M’yor? Imoha ning gingharian ang Poblacion, ako lang maoy nagbantay. Kadiyot lang sa kay maghikay akong asawa, magkombera tag gamay.” Mibarog si Isyot paingon sa gawas aron lilion ang iyang kapikas.

Daling nabalik si Kikoy gikan sa Silmugi dala ang iyang inahang naglukdo sa mga linabhan. Gipahimutang ni Nang Nimfa ang iyang mga linabhan ug daling naghaling sa abohan aron hikayan og paniudto ang ilang mga bisita. Nabiktima ang walo ka bantres nga wa magdahom nga maluglogan silag liog niining taknaa. Nanghiwa sa lamas ni Nang Nimfa samtang nanghimulbol sa manok ang mga batos sa mayor nga kakaonon na og linat-ang tinibuok ug gusto na pong mohigop og sabaw. Duna poy naghaling sa mga sugnod aron tak-angan sa kaldero. Halayo pa ang pista ni San Sebastian apan daw nag-una ang selebrasyon sa balay sa ilang kapitan. Gipagawas ang mga sartin nga nagkamuritsing pas abog. Mipabuhagay og daghang beer ug Kulafu ang mayor ug puwerteng kinantahay sa mga bisita. Dunay mga trabahante sa munisipyo, mga tanod ug ubang konsehales sa lungsod nga way laing gisumsoman, ang politika ug ang Silmugihanong mitolohiya. Pag-abot sa kilumkilom, misawop uban sa Adlaw ang kasadya.

 

V

MIBANSIWAG ang haring Adlaw sa sayong kabuntagon ug laing matang sa linalang na pod ang nanuktok sa balay sa pamuno sa barangay. Kon dili ni huwam, mangayo nig hinabang o di ba kaha manghatag og abot sa ilang ani. Sama sa naandan, si Kikoy nga sayo tigmatahan, mao na poy naghatod sa balita paingon sa higdaanan sa iyang amahan. “Pa, naay dakong tawong nagsakay og awto, nangita nimo.”

Hilom nga mibangon si Isyot apan nagduhaduha siya og duol paingon sa tawo tungod kay daw may kakulba nga mikanaas sa iyang dughan. Wala siya magpadaog sa kusog nga tinagubtob sa iyang kasingkasing. Busa, sama sa kaisog ni Kikoy, gisugat niya kini ug migawas gikan sa puti nga Everest ang bus-ok nga lalaki, may pangedaron ug desente ang panamit, long sleeves ug necktie. Wala siya makaklaro kon kinsa ang maong lalaki. Nagdala kinig attaché case ug mipaduol sa ilang kawayan nga gate. Sa dihang naigo na kini sa klarong lantaw ni Isyot, iyang nasuta nga kini mao si Atty. Leopoldo Versoza. Medyo puti na nig buhok ang iyang suod nga ig-agaw ug kababata nga sayo milangyaw sa siyudad.

Edaran na ang iyang ig-agaw apan batan-on gihapon ang panagway niini sa iyang handurawan. Sama gihapon kini kaambongan adtong mga panahon nga manguha silag uwang sa Silmugi, inigkahuman manuba silag saging sa lupot.

“Maayong adlaw, Kapitan. Kaila pa ka nako?” tisngi nga pasiuna sa abogado nga nahingawa sa iyang suod nga ig-agaw. “Dugaya na nako wa kabalik dinhis atoa, uy. Apan nagpabilin man gihapon nimo ang kabatan-on,” sumpay ni Polding.

“Abi man nakog kinsang artistaha, uy. Dali, Atorney, dayon dinhis akong gamay nga pinuy-anan. Basin di na ka motungtong og dili tiles, ha-ha! Di na man ka marits, uy! Gikalimtan na nimo ang Borbon?” timbaya ni Isyot samtang si Kikoy mitago sa may haligi kay nahadlok sa dako nga tawo.

“Sus, pinobre ba uroy. Ikaw man gani ang kinanindotan og balay diris Poblacion. Kon nasayod ka lang, wa gayoy adlaw nga di mosantop sa akong panumdoman kining akong yutang natawhan, Gaw, kaniadtong manginhas ta sa hunasan unya mag-usdong ang bungkawil sa atong mga bukag. Kalami na man gayod usbon adtong mga higayona! Pero morag wala may kalamboan ang atong lungsod sukad sa akong pagbiya, Gaw. Mao ra gihapon, walay bag-ong edipisyo, walay ospital. Sa ato pa, nagpabiling third world nga lungsod ang Borbon,” sa abogado.

“Unsaon man sad, Gaw, nga di man kuno moabag ang gobernador sa atong mayor tungod kay lainlain silag partido. Way budget gikan sa Kapitolyo. Mao nang hangtod karon, nag-aginod gihapon ni atong lungsod,” ni Isyot nga nanalipod sa iyang mayor.

“Tuo man ka ana, Gaw, uy, nga naa man nay budget nga tinuig intawon. Naa man nas balaod. Gihurot lang gayod nag lala sa palahubog nga mayor,” tubag ni Polding. “Mao bitaw nga nia ko dinhi, Gaw, kay gituboy ko sa gobernador nga padaganon ko ug mayor dinhi sa atoa. May budget gikan sa Nacionalista National, Gaw. Wa tay problema sa pundo. Sakto pod kaayo ron kay duna koy igsasang-at nga reklamo sa Commission on Audit mahitungod anang unliquidated nga kuwarta sa munisipyo. Kuahon tika isip konsehal sa akong slate kay unsay imong pulong mao bayay balaod dinhi sa Poblacion” 

“Unsaon man ni, Gaw, nga nakasaad na man ko ni M’yor Lando. Unsa na lay ikasulti niya ug sa iyang katawhan. Mahu’g kog walay baroganan ani, Gaw,” tubag ni Isyot nga may sagol kabalaka.

“Mas bililhon na diay ang tubig kaysa dugo karon, Gaw?” pinabundak nga tubag ni Polding. “May bisan usa ka patak nga dugo diay si Lando diha sa imong ugat? Porsuso ko nimo nga kaliwat, Gaw, imo diay kong talikdan? Sige, hinuktoki lang sa nag tarong. Basta gireserbahan tikag lingkoranan sa akong konseho.”

Ang kahilom sa panimalay sa kapitan niadtong higayona nagtago sa huyhoy niyang abaga ug sa nagkurog niyang tuhod nga bisan ang tuktugaok sa iyang mga sunoy lanog ngadto sa ilang hawanan. Migawas ang abogado nga wala ihatod sa iyang ig-agaw. Ang mata ni Kikoy nagsud-ong sa masulub-on niyang amahan apan naglibog sa mga panghitabo. Gienggansa ang kambiyada sa Everest ug kusog nga mipabulhot.

 

VI

MILABAY ang pipila ka buwan. Nagsugod na og pamilit sa mga poster ang isigkapartido ug, uban sa kainit sa piniliay, nag-anam pod kabugnaw ang gana ni Isyot sa politika. Iyang gitimbang-timbang kon kinsay angayan niyang suportahan sa umaabot nga eleksiyon. Tuod man, iyang gibalibaran ang iyang ig-agaw kay lig-on ang iyang baroganan sa iyang mga pulong nga gibuhian ngadto kang Mayor Lando. Nakasabot ra pod si Atty. Polding ug nangayog pasaylo. “Way problema na, Kap, basta magpabilin atong pagka manag-agaw.”

Unahan sa simbahan sa Lugo, nahimutang ang dos andanas nga mansiyon sa mayor sa Borbon. Misulod ang tulo ka tawo sa gate ug giablihan kini sa tiguwang nga katabang nga walay pagduhaduha. Nagtagsa kini silag motor, nanagbonet og puros nanagsul-ob ug helmet. Mingkanaog sila sa motor apan wala tangtanga ang ilang gisul-ob nga helmet. Gipadayon sila sa mga katabang ngadto paingon sa opisina sa mayor. Naglingkod sa iyang lamesa ang mayor nga nagsige og pabuhot sa iyang tinustos nga lumboy samtang nagtungab sa pilsen. Gihubo sa tulo ka tawo ang ilang mga helmet ug mitin-aw ang ilang mga dagway ngadto sa mayor. Sila mao si SPO1 Rudy Patalinghug, PO2 Ener Obscura, ug PO1 Mark Cabahug, nga bayaw ni Tiyago Kimpang. Milanog ang bahakhak sa mayor ug dayon giserad-an ang pultahan sa lawak.

 

VII

NAGHIKAY og tinuwang tuloy si Nang Nimfa ug puwerteng nakahigop sa sabaw nilang Isyot ug Kikoy nga daw naglumba. Pagkahuman sa panihapon, nanghipos si Nang Nimfa sa ilang gikan-an ug misunod pod si Kikoy paingon sa luyo sa balay. Mitangka si Isyot sa pultahan aron magpahangin apan gisugat siya ni Tiyago nga naghangos.

“Kap, maayong gabii. Dia akong ilis, ohh. Daghan kaayong salamat, Kap,” sa tiguwang kimpang nga nagtukod sa iyang crutches. “Duna pod koy pahimangno nimo, Kap. Ayawg kompiyansa kay miingon si Marites nga ang iyang manghod nga polis nakaapil kuno sa miting sa balay ni Mayor; ipahipos kuno ka sa mayor kay bisan mipasalig ka niya, duna gayod kunoy purohan nga motambling ka sa kataposang minuto. Managana na lang kuno siya kay basin kunog luyhon nimo siya. Kamo kunong duha ni Nyor Polding iyang ipakuot, Kap. Di man gayod kaako si Mark nga di ka pasidan-an, Kap. Dugang pas mayor, mopuwa kuno ang suba sa Silmugi sa di pa magsugod ang piniliay. Ari sa ko, Kap. Pag-amping,” sumbong ni Tiyago.

Buot motubag si Isyot apan daw gitupsan sa mga pulong ang iyang tutunlan ug mitalikod na pod si Tiyago. Puno sa kabalaka ang iyang dughan alang sa iyang pamilya ilabi na sa iyang inosenteng anak. Nahapit pod ang iyang hunahuna ngadto sa seguridad ni Rodney ug Michelle nga nangeskuyla sa usa ka unibersidad sa siyudad nga didto na pod nangabang.

Minglabay ang pipila ka adlaw, wala siya magpasabot nga nakahibawo siya mahitungod sa planong pagtipi kaniya. Padayon gihapon siyang maghapyod sa iyang mga hiniktan matag buntag ug bisan ang iyang kapikas wala niya sultihi mahitungod niini.

 

VIII

MIABOT ang kataposang adlaw sa kampanya ug ugma na sa buntag ang eleksiyon. Nag-anam nag panghipos sa ilang mga gamit ang magtiayon. Pasangil ni Isyot sa iyang kapikas, “Mobakasyon usa ta sa Gairan, Ma, kay samok ang politika ilabi na rong panahona.”

Mikisdom ang kahaponon ug ang kasagaran sa mga lumulupyo nagtapok sa plasa sa lungsod aron maminaw sa miting de abanse ni Mayor Arisgado. Lanog ang bapols ug ang mga pulong sa matag konsehal inubanan sa pakpak sa ilang mga binayran. Wa padaog ang pikas partido, ang katunga sa katawhan tua pod sa basketan sa Brgy. Cabalilitan alang sa ilang pulong-pulong sa di pa moabot ang adlaw sa piniliay.

Nag-ihap sa mga takna si Isyot. Isiglakaw na ang ilang kasilinganan nga puros nang-agni kaniya aron mokuyog apan managsama niyang giingnan, una lang mo, mosunod ra ko. Nag-anam kadaghan ang mga tawo sa plasa sa lungsod ingon man sa Brgy. Cabalilitan ug namingaw ang kabalayan duol sa Silmugi. Gipanaog ni Isyot ang iyang asawa ug si Kikoy paingon sa Silmugi kay didto nagpaabot ang pambot. Giablihan ni Isyot ang iyang transistor ug milanog ang “Please Release Me” nga bersiyon ni Victor Wood.

Paglabay sa pipila ka gutlo, mikagalgal ang makina sa nagdangarang nga police car. Dali siyang mihupo ug milipot paingon sa suba. Misakay sa pambot ug naninguha siyag duso-bira sa krang ug duyog sa kagalkal sa makina ang di maihap nga rakrak ug buto-buto sa mga pistola nga buot motumpag sa ilang panimalay. Mihupo silang tulo kay nanagana nga basin matapsingan sa bala, simbako. Sa ibabaw, ang madag-omong panganod giadornohan sa nagkadaiyang kolor sa fireworks nga pasundayag sa mayor atol sa pagsugod sa ilang pulong-pulong. Mikabat og traynta minutos ang fireworks ingon man ang pagrakrak. Walay nakadungog sa buto-buto kay didto man tanang lumulupyo sa isigkapartido ug nalingaw nga nag-aninaw sa fireworks display.

Uban sa padayong pakigbisog sa pambot sa mga bawod mao pod ang panagsumpaki sa mga pangutana sulod sa salabotan ni Kikoy nga nagtambo sa luyo nganong dunay nagpabuto nga wala pa may Pasko. Rebentador ba kini? O kaha Good Bye Philippines? Good Bye Poblacion tingali. Si Isyot nagkurog na pod ang tuhod samtang nagsige og lingi sa nag-anam katumpag niyang payag.

Gihatod sila sa mga bawod paingon sa lawod. Wala na molingi si Isyot nga nagtimon sa iyang gamayng pambot ug nanarapo sa dagkong lusok sa iyang singot ug luha samtang si Nang Nimfa luspad nga nangadye ug naggakos sa iyang kamanghoran. Sa paglingi ni Kikoy, nakita niya ang bulawanong barko nga daw Titanic ang gidak-on nga nagsunod kanila.

“Ma… Pa… ang barko! Ang barko sa Silmugi, lingia ninyo! Naggilak-gilak og maayo! ” ni Kikoy nga way puas nga nagbira-bira sa sando sa iyang papa. Apan wala siya panumbalinga. Nagpadayon pagtimon ang iyang amahan sa pambot.

Sa ilang paglangyaw, nahanaw ang mga estorya mahitungod kanila ug wala na mahibaw-i kon hain na manimuyo ang pamilya. Apan wala gihapon mapapas ang mga kulukabildo mahitungod sa Silmugi ug nahimo na lang kining tipik sa ngiob nga kagahapon sa mga taga Borbon.

 

Una kining napatik sa Manila Bulletin – Bisaya Magasin

Newsletter Subscription

I want to be updated with the latest news from Payag Habagatan.

Published by

Kenneth Michael Baba

Si Kenneth Michael Baba kasamtangang nagtungha sa University of the Philippines- Cebu isip BA in Political Science. Miyembro sab siya sa Hablon ug UP Cebu -TINTA. Nahilakip siya sa Cebu Young Writers' Studio 2018, 2nd Kagis Creative Writers' Workshop ug ang Tagik-Landasan Writing Workshop. Ubay-ubay na siyag mga artikulo, balak ug sugilanon nga napatik sa Manila Bulletin's Bisaya Magasin. Siya usa ka lumulupyo sa dakbayan sa Talisay.

Leave a Reply

Your email address will not be published. Required fields are marked *